Types of Majorities in India: Simple, Absolute, Effective and Special Majority Explained

Downloads: loading...

Total Downloads: loading...

ഇന്ത്യൻ ഭരണഘടനയിലെ ഭൂരിപക്ഷങ്ങൾ: സാധാരണ, കേവല, ഫലപ്രദ, പ്രത്യേക ഭൂരിപക്ഷങ്ങൾ

ഇന്ത്യൻ പാർലമെന്ററി വ്യവസ്ഥയിൽ, വിവിധ ബില്ലുകളും പ്രമേയങ്ങളും ഭരണഘടനാ ഭേദഗതികളും പാസാക്കുന്നതിന് ഭരണഘടന വ്യത്യസ്ത തരത്തിലുള്ള ഭൂരിപക്ഷങ്ങൾ നിർദ്ദേശിക്കുന്നു. സുപ്രധാനമായ മാറ്റങ്ങൾക്ക് ആവശ്യമായ പൊതുസമ്മതമുണ്ടെന്ന് ഉറപ്പാക്കാനുള്ള സുരക്ഷാസംവിധാനങ്ങളായാണ് ഈ ഭൂരിപക്ഷങ്ങൾ പ്രവർത്തിക്കുന്നത്.

ഇന്ത്യയിലെ നാല് പ്രധാന ഭൂരിപക്ഷങ്ങൾ:

സാധാരണ ഭൂരിപക്ഷം (Simple Majority / Working Majority)

പാർലമെന്റിലും സംസ്ഥാന നിയമസഭകളിലും ഏറ്റവും കൂടുതൽ ഉപയോഗിക്കുന്ന ഭൂരിപക്ഷമാണിത്.

നിർവചനം: സഭയിൽ ഹാജരുള്ളവരും വോട്ട് രേഖപ്പെടുത്തുന്നവരുമായ അംഗങ്ങളുടെ 50% ത്തിലധികം. വോട്ടെടുപ്പിൽ പങ്കെടുക്കാത്തവരോ വിട്ടുനിൽക്കുന്നവരോ ആയ അംഗങ്ങളെ ഇതിൽ കണക്കാക്കില്ല.

ഉപയോഗിക്കുന്ന സന്ദർഭങ്ങൾ:

പുതിയ സംസ്ഥാനങ്ങളുടെ രൂപീകരണം.
നിലവിലുള്ള സംസ്ഥാനങ്ങളുടെ അതിർത്തികളും പേരുകളും മാറ്റൽ.
പൗരത്വം നേടുന്നതും റദ്ദാക്കുന്നതുമായി ബന്ധപ്പെട്ട ഭരണഘടനാ ഭേദഗതികൾ.
സാധാരണ ബില്ലുകൾ, ധനബില്ലുകൾ (Money Bills), സാമ്പത്തിക ബില്ലുകൾ (Financial Bills) എന്നിവ പാസാക്കാൻ.
അവിശ്വാസ പ്രമേയം, വിശ്വാസ പ്രമേയം, സഭാനിർത്തിവെക്കൽ പ്രമേയം, കുറ്റപ്പെടുത്തൽ പ്രമേയം എന്നിവ പാസാക്കാൻ.
ലോക്സഭയിലെയും സംസ്ഥാന നിയമസഭകളിലെയും സ്പീക്കർ, ഡെപ്യൂട്ടി സ്പീക്കർ എന്നിവരുടെ തിരഞ്ഞെടുപ്പ്.
സംസ്ഥാന നിയമസഭകൾ ഭരണഘടനാ ഭേദഗതികൾക്ക് അംഗീകാരം (Ratification) നൽകൽ.
സാമ്പത്തിക അടിയന്തരാവസ്ഥയോ രാഷ്ട്രപതി ഭരണമോ പ്രഖ്യാപിക്കാൻ.
ദേശീയ അടിയന്തരാവസ്ഥ പിൻവലിക്കാൻ.

കേവല ഭൂരിപക്ഷം (Absolute Majority)

സഭയിൽ എത്രപേർ ഹാജരാകാതിരുന്നാലും വോട്ടെടുപ്പിൽ നിന്ന് വിട്ടുനിന്നാലും, സഭയുടെ ആകെ അംഗസംഖ്യയെ അടിസ്ഥാനമാക്കി നിശ്ചയിച്ചിട്ടുള്ള ഭൂരിപക്ഷമാണിത്.

നിർവചനം: സഭയുടെ ആകെ അംഗസംഖ്യയുടെ 50% ത്തിലധികം.

ഉദാഹരണത്തിന്: ലോക്സഭയിൽ (ആകെ സീറ്റുകൾ 543) കേവല ഭൂരിപക്ഷം എന്നാൽ 272 ഓ അതിൽ കൂടുതലോ ആണ്.

ഉദാഹരണത്തിന്: കേരള നിയമസഭയിൽ (ആകെ സീറ്റുകൾ 140) ഇത് 71ഓ അതിൽ കൂടുതലോ ആണ്.

ഉപയോഗിക്കുന്ന സന്ദർഭങ്ങൾ

ബില്ലുകളോ പ്രമേയങ്ങളോ പാസാക്കുന്നതിനായി കേവല ഭൂരിപക്ഷം മാത്രമായി സാധാരണ ഉപയോഗിക്കാറില്ല.

കേന്ദ്രത്തിലും സംസ്ഥാനങ്ങളിലും സർക്കാർ രൂപീകരണത്തിലാണ് ഇതിന്റെ പ്രധാന പ്രാധാന്യം.
ഒരു രാഷ്ട്രീയ പാർട്ടിക്കോ സഖ്യത്തിനോ സർക്കാർ രൂപീകരിക്കാൻ കേവല ഭൂരിപക്ഷം തെളിയിക്കേണ്ടതുണ്ട്.

ഫലപ്രദമായ ഭൂരിപക്ഷം (Effective Majority)

സഭയിലെ ഒഴിഞ്ഞുകിടക്കുന്ന സീറ്റുകൾ (Vacancies) ഒഴിവാക്കിക്കൊണ്ട് കണക്കാക്കുന്ന ഭൂരിപക്ഷമാണിത്.

നിർവചനം: സഭയുടെ ഫലപ്രദമായ അംഗസംഖ്യയുടെ (Effective strength) 50% ത്തിലധികം.

മരണമോ രാജിവെക്കലോ യോഗ്യതക്കേടോ കാരണം ഒഴിഞ്ഞുകിടക്കുന്ന സീറ്റുകൾ ആകെ അംഗസംഖ്യയിൽ നിന്ന് കുറച്ചാണ് 'ഫലപ്രദമായ അംഗസംഖ്യ' കണ്ടെത്തുന്നത്.

ഉപയോഗിക്കുന്ന സന്ദർഭങ്ങൾ:

രാജ്യസഭയിൽ ഇന്ത്യയുടെ ഉപരാഷ്ട്രപതിയെ പുറത്താക്കാൻ (ആർട്ടിക്കിൾ 67(b)).

ലോക്സഭയിലെയോ സംസ്ഥാന നിയമസഭകളിലെയോ സ്പീക്കർ, ഡെപ്യൂട്ടി സ്പീക്കർ എന്നിവരെ പുറത്താക്കാൻ.
രാജ്യസഭാ ഡെപ്യൂട്ടി ചെയർമാനെ പുറത്താക്കാൻ.
ഒരു സംസ്ഥാനത്തെ ലെജിസ്ലേറ്റീവ് കൗൺസിൽ (നിയമനിർമ്മാണ കൗൺസിൽ) ചെയർമാൻ, ഡെപ്യൂട്ടി ചെയർമാൻ എന്നിവരെ പുറത്താക്കാൻ.

പ്രത്യേക ഭൂരിപക്ഷം (Special Majority)

സാധാരണ, കേവല, അല്ലെങ്കിൽ ഫലപ്രദമായ ഭൂരിപക്ഷങ്ങളിൽ നിന്നും വ്യത്യസ്തമായ എല്ലാ ഭൂരിപക്ഷങ്ങളും പ്രത്യേക ഭൂരിപക്ഷത്തിൽ പെടുന്നു.
ഏറ്റവും കണിശമായ ഈ ഭൂരിപക്ഷം പ്രധാനമായും ഭരണഘടനാ ഭേദഗതികൾക്കാണ് ഉപയോഗിക്കുന്നത്.

ഭരണഘടനയുടെ വിവിധ ആർട്ടിക്കിളുകൾ പ്രകാരം നാല് തരത്തിലുള്ള പ്രത്യേക ഭൂരിപക്ഷങ്ങളുണ്ട്:

ടൈപ്പ് 1 : ആർട്ടിക്കിൾ 249 & 312 പ്രകാരം

നിബന്ധന : സഭയിൽ ഹാജരുള്ളവരും വോട്ട് രേഖപ്പെടുത്തുന്നവരുമായ അംഗങ്ങളുടെ മൂന്നിൽ രണ്ട് (2/3) ഭാഗത്തിൽ കുറയാത്ത ഭൂരിപക്ഷം.

ഉപയോഗിക്കുന്ന സന്ദർഭങ്ങൾ : സംസ്ഥാന ലിസ്റ്റിലെ (State List) ഒരു വിഷയത്തിൽ നിയമമുണ്ടാക്കാൻ പാർലമെന്റിന് അധികാരം നൽകുന്ന രാജ്യസഭാ പ്രമേയം പാസാക്കാൻ (ആർട്ടിക്കിൾ 249).

അല്ലെങ്കിൽ ഒന്നോ അതിലധികമോ ഓൾ ഇന്ത്യ സർവീസുകൾ (All India Services) രൂപീകരിക്കാൻ (ആർട്ടിക്കിൾ 312).

ടൈപ്പ് 2 : ആർട്ടിക്കിൾ 368, ആർട്ടിക്കിൾ 352, ആർട്ടിക്കിൾ 169 പ്രകാരവും പ്രധാന ഭരണഘടനാ ഉദ്യോഗസ്ഥരെ പുറത്താക്കുന്നതിനും

നിബന്ധന : താഴെ പറയുന്ന രണ്ട് കാര്യങ്ങളും ഒരുമിച്ച് വേണം:

സഭയിൽ ഹാജരുള്ളവരും വോട്ട് രേഖപ്പെടുത്തുന്നവരുമായ അംഗങ്ങളുടെ 2/3 (മൂന്നിൽ രണ്ട്) ഭാഗം ഭൂരിപക്ഷവും, കൂടാതെ കേവല ഭൂരിപക്ഷവും (സഭയുടെ ആകെ അംഗസംഖ്യയുടെ 50% ത്തിലധികം).

ഉപയോഗിക്കുന്ന സന്ദർഭങ്ങൾ :

ഒട്ടുമിക്ക ഭരണഘടനാ ഭേദഗതി ബില്ലുകൾക്കും.

ആർട്ടിക്കിൾ 352 – ദേശീയ അടിയന്തരാവസ്ഥ പ്രഖ്യാപിക്കുന്നതിനുള്ള അംഗീകാരം നൽകാൻ.
സുപ്രീം കോടതി, ഹൈക്കോടതി ജഡ്ജിമാരെ പുറത്താക്കാൻ.
മുഖ്യ തിരഞ്ഞെടുപ്പ് കമ്മീഷണറെയും (CEC) സംസ്ഥാന തിരഞ്ഞെടുപ്പ് കമ്മീഷണറെയും (SEC) പുറത്താക്കാൻ.
കൺട്രോളർ ആൻഡ് ഓഡിറ്റർ ജനറലിനെ (CAG) പുറത്താക്കാൻ.
ആർട്ടിക്കിളിൽ 169 - ഒരു സംസ്ഥാന ലെജിസ്ലേറ്റീവ് കൗൺസിൽ രൂപീകരിക്കാനും റദ്ദാക്കാനും.

ടൈപ്പ് 3 : ടൈപ്പ് 2 + സംസ്ഥാനങ്ങളുടെ അംഗീകാരം (State Ratification)

നിബന്ധന : ആർട്ടിക്കിൾ 368 പ്രകാരമുള്ള പ്രത്യേക ഭൂരിപക്ഷവും (മുകളിൽ പറഞ്ഞ ടൈപ്പ് 2), അതിനുപുറമെ രാജ്യത്തെ പകുതി സംസ്ഥാന നിയമസഭകളുടെ സാധാരണ ഭൂരിപക്ഷത്തോടെയുള്ള അംഗീകാരവും.

ഉപയോഗിക്കുന്ന സന്ദർഭങ്ങൾ : ഇന്ത്യയുടെ ഫെഡറൽ ഘടനയിൽ മാറ്റം വരുത്തുന്ന ഭരണഘടനാ ഭേദഗതികൾക്ക് (ഉദാഹരണത്തിന്: ചരക്ക് സേവന നികുതി- (GST) നടപ്പിലാക്കൽ, രാഷ്ട്രപതി തിരഞ്ഞെടുപ്പിലെ മാറ്റങ്ങൾ, അല്ലെങ്കിൽ കേന്ദ്രവും സംസ്ഥാനങ്ങളും തമ്മിലുള്ള നിയമനിർമ്മാണ അധികാരങ്ങളുടെ വിതരണത്തിലുള്ള മാറ്റങ്ങൾ).